香港小姐2012 賽前預測

仲有3日，雷聲懶大雨點喪小的第40屆香港小姐就會誕生，今年無線突破賽制，大會評判會先從10位佳麗中選出3甲，然後再由全港市民透過互聯網及手機程式，一人一票選出心目中的冠軍！

咦，照咁睇，對樣靚但口才無咁好的佳麗有著數喎，因為普羅市民都是重外型多過內涵架嘛！不如就等我做少少賽前分析，睇下邊位佳麗有機突圍呢！？

陳潔玲 Christy Chan

年齡︰24 / 職業︰模特兒 / 學歷︰副學士 / 身高︰5'5"

被傳媒冠以「人微妍希」的稱號，是高登仔勁buy的佳麗之一。但談吐麻麻，講嘢時板口板面唧都唔笑，要大大改善一下。身材方面都是扁平一族，穿上泳裝應該無咩睇頭！

入圍3甲指數：45% / 冠軍指數：5%

張名雅 Carat Cheung

年齡︰24 / 職業︰學生 / 身高︰5'4"

張堅庭親戚，強國味甚濃，但竟然是直入決賽的3位佳麗之一，非常抓頭呢！不過談吐則ok淡定，又無鄉音，問題環節可能是她的強項吧！

入圍3甲指數：45% / 冠軍指數：5%

張鈞美 Amy Cheung

年齡︰22 / 職業︰學生 / 身高︰5'5½"

是最後一圍10強的佳麗，來自美國紐約，英文好過中文嗰隻。樣貌唔算好mass但我個人來講就幾ok，整體感覺很自然。我推測呢類佳麗應該幾受評判歡迎 (除咗見評判時表現幾差)。

入圍3甲指數：65% / 冠軍指數：20%

朱千雪 Tracy Chu

年齡︰24 / 學歷︰大學畢業 / 身高︰5'5½"

有不少網民話佢似朱玲玲喎，其實係咪個嘴唇厚厚地就覺得似咋？朱千雪跟張鈞美屬同一類型佳麗，以自然取勝，但身材比例稍遜，可能泳裝會是其失分重點。

入圍3甲指數：65% / 冠軍指數：20%

林泳淘 Wingto Lam

年齡︰22 / 職業︰模特兒 / 身高︰5'7"

參選前已是一隊聽都未聽過的女子組合"Lacee Lacey"成員，應該是矢志入娛樂圈的。這類佳麗年年總有3幾個，樣貌ok、身材ok、談吐都ok但硬係選唔到。大概評判索到陣「好恨入娛樂圈」味，所以索性等你落選盡快做藝員囉。

入圍3甲指數：40% / 冠軍指數：10%

李渼琦 Melanie McAndrew

年齡︰20 / 職業︰學生 / 身高︰5'6"

來自澳洲布里斯本的混血兒，是年紀最輕的參選佳麗。論樣貌絕對是今年的省鏡之選，但談吐極之麻麻，經常都無喱神氣未食飯咁，未聽佢講到第三句已經zzzzzz！如果能改善這個問題，3甲有望。

入圍3甲指數：70% / 冠軍指數：30%

岑杏賢 Jennifer Shum

年齡︰23 / 職業︰學生 / 身高︰5'7"

已得"時尚目光大獎"的岑杏賢有"翻版郭錦恩"之稱，是今屆學歷最高的佳麗，現時是一位碩士學生。整體包裝好有冠軍相：學歷高，談吐跟身體語言也很大方，所以我都幾買重佢。

入圍3甲指數：85% / 冠軍指數：70%

湯洛雯 Roxanne Tong

年齡︰25 / 職業︰模特兒 / 身高︰5'7½"

因父親湯鎮宗的關係一直都是傳媒的焦點，亦算是頂頭大熱之一。自身條件不俗，置身這10位佳麗之中亦見突出，缺點是經常一臉倦容，面青口唇白。暫時已得「旅遊大使」獎，所以入3甲應該幾穩陣，但能否再上一層樓就真是要睇睇狀態啦。

入圍3甲指數：80% / 冠軍指數：60%

曾明俐 Cynthia Tsang

年齡︰26 / 職業︰機艙服務員 / 身高︰5'6"

來自港姐冠軍搖籃：加拿大溫哥華，是直入決賽的3位佳麗之一。幾有fashion sense，身材及儀態亦是比較突出的佳麗，但樣貌不算討好，網上更有網民話佢同馬蹄露十足一個餅印，超慘！

入圍3甲指數：40% / 冠軍指數：20%

黃心穎 Jacqueline Wong

年齡︰23 / 職業︰學生 / 身高︰5'4"

每年都有啲唔知點解會入圍的佳麗，今年的代表是黃心穎！無樣條件是突出的，但仍然擊敗眾多質素較好的佳麗殺入10強真是天無眼。不過咁，今個星期日都應該是陪跑一族。

入圍3甲指數：10% / 冠軍指數：0%

最後提提大家：敝網址主辦的香港小姐12 Blogger's Choice繼續接受評審登記，想參加就高速發一個電郵到ent_hk@ymail.com啦，今晚7點就截止架啦！