收荷里活價30年後再拍賀歲片 發哥笑住插霆鋒一刀

(綜合報道)(星島日報報道)劉偉強監製、王晶執導的2014賀歲電影《賭城風雲》(暫名)昨日於將軍澳電視城舉行記者會暨開鏡拜神儀式,一眾演員周潤發、謝霆鋒、杜汶澤與張晉等均有出席。發哥自爆從80年代拍過《八星報喜》後,便未再拍賀歲片,笑言這段時間霆鋒不但大個仔仲生埋兩個仔。霆鋒聞言即謂:「還離埋婚呢!」惹得發哥馬上道歉,笑稱自己不知情,更謂:「離婚仲快過我。」文:鄺幸瑜 圖:譚志光 由電視廣播有限公司、博納影業集團、星王朝影視製作有限公司、三鋒娛樂在有限公司、太陽娛樂文化有限公司聯合出品的2014賀歲電影《賭城風雲》(暫名),昨日舉行盛大記者暨開鏡拜神儀式,一眾演員周潤發、謝霆鋒、杜汶澤、張晉、景甜和孟瑤等出席,場面墟冚。 發哥教霆鋒溝女 記者會上,消瘦不少的發哥,身形拍得住霆鋒,他自言跟霆鋒一樣不吃東西幾個月,還笑稱該片並非賭片而是警匪片。他說:「阿澤負責搞笑,霆鋒就負責詠春,是動作搞笑片。動作由霆鋒做啦,簡單就由我做。自從80年代拍過賀歲片《八星報喜》後,就無拍過賀歲片,港產片都有成30年無拍。霆鋒都大個仔,仲生埋仔女。」在旁的霆鋒即說:「離埋婚啦!」發哥接着說:「我唔知道,對唔住,而家連離婚都快過我。」其後,阿澤問霆鋒還有甚麼想在台上講?霆鋒笑言:「講完啦!俾人插咗一刀。」 發哥透露,在片中會教霆鋒溝女,他笑稱:「我身邊有好多女,全部都過60歲,50後歸我,90後歸他們(霆鋒與阿澤)。」問到角色可有賭神的影子?發哥說:「是全新故事,會打到天昏地暗,霆鋒會打詠春,我玩吓啤牌同麻將。」問到接拍此片的吸引力?他說:「班底有王晶、劉偉強,還有我偶像謝霆鋒,如果我唔拍,對唔住他伯爺(謝賢)同阿媽(狄波拉),我同他的伯爺在TVB合作過,當年他照顧我好多,現在我嚟報恩,睇吓點恰佢。」追問收的是否天價片酬?他笑言要問周太(發嫂陳薈蓮)。 大讚《衝II》靚人靚景 此外,發哥坦言有看過劇集《衝上雲霄II》,大讚有靚女、靚仔及靚景。問到可有興趣拍第三輯?他謂:「我一定要做Captain(指部長),在機艙上面講『Table for two 』(真係想拍?)我怕我捱唔住!(你肯拍一定贏晒張智霖與吳鎮宇啦!)唔好咁講!他們兩個是我偶像,兩個都好有味道、好好睇。」 問到其他演員的評價?發哥說:「馬國明曳啲,咁多女,墾丁一個,香港一個。」他又笑謂未看過上一輯,反問劇中的胡杏兒是否要硬繃繃對住哥哥張智霖,似想殺死人咁款,但讚他們均演得好。他說:「8點半嗰齣《師父.明白了》都好睇,翠如BB都做得好。(凌晨的《溏心風暴》呢?)睇咗啦!」 發哥坦言今次到電視城出席記者會,感覺似主場。不過,談到增發電視牌照一事,發哥則謂:「未出到牌咩?舊政府有無支持他(王維基)出牌,好似上一任政府應承咗,今屆政府無出牌畀佢咩?遲啲啦!一定批到的。(會否支持有多幾個電視台?)多個電視台好,多啲嘢睇好啲。」 另外,導演王晶表示《賭》片會在香港、深圳、珠海及澳門取景,發哥的片酬和待遇會跟足對方在荷里活的身價,跟以往拍《大上海》一樣。 ■發哥消瘦不少,他笑言跟霆鋒一樣絕食了幾個月。 ■孟瑤(左)與童菲能與發哥合演賀歲片,大感興奮。 ■孟瑤的大露背搶晒鏡。 ■賀歲片《賭城風雲》昨日於電視城舉行開鏡拜神儀式。 ■發哥在台上妙語連珠,令霆鋒及阿澤都捧腹大笑。